खड्ड्यामुळे कापसाची ट्राली पलटी; चालक जखमी

गिरड/प्रतिनिधी रेणकापूर गावासमोरील रस्त्याची गिट्टी पूर्णपणे उखडून गेल्यामुळे त्याठिकाणी अपघातात वाढ झाली आहे. दरम्यान, कापूस घेऊन जाणारा ट्रॅक्टर खड्यामुळे पलटल्याने चालक जखमी झाला. ही घटना सोमवार २७ रोजी घडली. जाम (चौरस्ता) ते समुद्रपूर अशा ५ किमी रस्त्यावर खड्डेच खड्डे दिसून येते. रेणकापूर गावासमोरील रस्त्याची गिट्टी पूर्णपणे उखडून गेली आहे.याबाबत अनकदा संबंधित विभागाकडे तक्रारी केल्या. या मार्गांवर जाम ते समुद्रपूरला येताना रेणकापूर गावाजवळ डाव्या बाजूला खड्ड्यांचे साम्राज्य पसरले आहे. रात्रीच्या वेळेस येताना खड्डे दिसत नाही. त्यामुळे दुचाकीस्वार खाली पडून जखमी होतात.

दरम्यान, सोमवारी दुपारी १२ वाजता डोंगरगाव येथून कापूस भरून ट्रॅक्टर समुद्रपूरकडे येत असताना रेणकापूर गावासमोरील खड्डा न दिसल्याने ट्राली पलटी झाली. या अपघातात चालक जखमी झाला. ट्रॅक्टर पलटी झाल्याने काही वेळासाठी वाहतूकही विस्कळीत झाली होती. या मार्गांवरून दररोज कोळशाची जड वाहतूक होत असल्याने रस्त्याची पूर्णत: चाळण झाली आहे. सुदैवान अपघातात जिवीहानी टळली. या अपघाताची माहिती देत गावकर्यांनी सार्वजनिक बांधकाम विभागाला तक्रार देऊन येत्या दोन-तीन दिवसात रस्त्याचे काम सुरू न झाल्यास आंदोलन करण्याचा इशारा दिला आहे.