निवडणूक निरीक्षकांकडून पूर्व तयारीचा आढावा

प्रतिनिधी/दै.जन-संग्राम वर्धा : वर्धा- चंद्रपूर- गडचिरोली स्थानिक प्राधिकारी मतदारसंघाच्या संपूर्ण निवडणूक प्रक्रियेवर देखरेख व नियंत्रण ठेवण्यासाठी भारत निवडणूक आयोगाकडून स्वाती म्हसे पाटील यांची निवडणूक निरीक्षक म्हणून नियुक्ती करण्यात आली आहे. त्यानुषंगाने श्रीमती पाटील यांनी मंगळवारी (दि. २) निवडणूक यंत्रणा तसेच नोडल अधिकाऱ्यांनी केलेल्या पूर्व तयारीचा आढावा घेतला.

जिल्हाधिकारी कार्यालयात पार पडलेल्या या बैठकीला वर्धा-चंद्रपूर-गडचिरोली प्राधिकारी मतदारसंघाच्या निवडणूक निर्णय अधिकारी तथा चंद्रपूरच्या जिल्हाधिकारी वसुमना पंत, पोलीस अधिक्षक आयुष नोपाणी, उपजिल्हा निवडणूक अधिकारी संजीव देशमुख, निवासी उपजिल्हाधिकारी दगडू कुंभार यांच्यासह सर्व नोडल अधिकारी उपस्थित होते. यावेळी निवडणूक निरीक्षक श्रीमती पाटील यांनी, सर्व नोडल अधिकाऱ्यांनी केलेल्या कामांची माहिती जाणून घेतली. तसेच निवडणुकीचे काम सर्वांनी अतिशय गांभीर्याने करावे. यात कोणतीही चूक होऊ देऊ नका. मतदान पत्रिका, मतदान पेट्या व इतर साहित्याचे वाटप, वाहतूक अतिशय काळजीपूर्वक करावी. अशा सूचना दिल्या. तत्पूर्वी त्यांनी चंद्रपूर तहसील कार्यालय येथे होणाऱ्या मतदान केंद्राची तसेच मतमोजणी कक्षाची पाहणीसुद्धा केली.

सादरीकरणातून जिल्हाधिकारी वसुमना पंत म्हणाल्या, वर्धा – चंद्रपूर – गडचिरोली स्थानिक प्राधिकारी मतदारसंघाकरीता एकूण १७५ मतदार असून यात पुरुष मतदार ४९५ तर स्त्री मतदार ४८० आहेत. सदर मतदार संघात चंद्रपूर जिल्ह्यातील १ महानगरपालिका, १० नगर परिषदा आणि ७ नगर पंचायती, गडचिरोली जिल्ह्यातील ३ नगर परिषदा आणि ९ नगर पंचायती तर वर्धा जिल्ह्यातील १० नगर परिषदांचा समावेश आहे. तिनही जिल्ह्यातील जिल्हा परिषदांच्या मतदारांची संख्या शून्य आहे. तिनही जिल्ह्यातील उपविभागीय अधिकारी कार्यालय / तहसील कार्यालय असे एकूण १७ मतदान केंद्र राहणार असून मतमोजणी चंद्रपूर येथील तहसील कार्यालयात होणार आहे.

यावेळी उपविभागीय अधिकारी तथा नोडल अधिकारी सर्वश्री विशालकुमार मेश्राम, उपजिल्हाधिकारी संजय पवार, अतुल जटाळे, शुभम दांडेकर, सचिन कुमावत, पालिका प्रशासन अधिकारी डॉ. विद्या गायकवाड, कार्यकारी अभियंता अक्षय पगारे, जिल्हा पुरवठा अधिकारी राहुल बहादुरकर, प्रादेशिक परिवहन अधिकारी किरण मोरे यांच्यासह दूरदृश्यप्रणालीद्वारे गडचिरोलीचे निवासी उपजिल्हाधिकारी आशिष वानखेडे, अपर पोलीस अधिक्षक कार्तिक, वर्धेचे निवासी उपजिल्हाधिकारी संजीव जाधव, अतिरिक्त पोलीस अधिक्षक संदीप वाघमारे आदी उपस्थित होते.

येथे राहतील निवडणूक निरीक्षक उपलब्ध : निवडणूक प्रक्रियेदरम्यान, उमेदवार/पक्ष किंवा मतदारांना निवडणूक निरीक्षक स्वाती म्हसे पाटील (मो. ९३०७१८१७३६) यांना भेटायचे असल्यास त्या, बकुळ, व्हीआयपी गेस्ट हाऊस, वन अकादमी, चंद्रपूर येथे सकाळी ११ ते १२ आणि सायंकाळी ५ ते ६ वाजेपर्यंत उपलब्ध राहतील.

निवडणूक प्रक्रियेदरम्यान भेटीचे वेळापत्रक : भारत निवडणूक आयोगाच्या आदेशानुसार संपूर्ण निवडणूक प्रक्रियेदरम्यान निवडणूक निरीक्षकांकडून देण्यात येणाऱ्या भेटीसंदर्भात वेळापत्रक पुढीलप्रमाणे आहे. प्रथम भेट : नामनिर्देशन पत्र स्वीकारण्याच्या अंतिम तारखेपासून उमेदवारी मागे घेण्याच्या अंतिम तारखेपर्यंत म्हणजे १ जून ते ४ जून २०२६. द्वितीय भेट : उमेदवारी मागे घेण्याच्या तारखेच्या एक आठवड्यानंतर तीन दिवसांकरिता म्हणजे १२ ते १४ जून २०२६. तृतीय भेट : प्रत्यक्ष मतदान तारखेच्या एक दिवस अगोदर पासून मतमोजणी प्रक्रिया संपुष्टात येऊन निवडणुकीचा निकाल जाहीर होईपर्यंत म्हणजे १७ जून ते निवडणुकीचा निकाल जाहीर होण्यापर्यंत.